تفسير بسيط لمرض الشقيقة و كيفية التعامل معه

0
1367
مرض الشقيقة
مرض الشقيقة
مرض الشقيقة أو migraine اسمها هاكا علمياً خاطر تضرب شق واحد من الجمجمة !
اما فالاصل هي اسمها هاكاكا خاطر تشق الجمجمة فالوسط.. المرض هذا مش كيفو كيف غيرو .. هو منفرد بذاتو عن كل الأمراض !
يعني وقت تشوفني ما تلاحظش اني نعاني منو .. خاطر ماعندو حتى آثار تظهر !
نكون نضحك .. نلعب.. ناكل .. و نجم نكون راقدة .. قاعدة و الا مانيش نعمل في شي ..
هي لحظة وحدة .. رمشة عين !
يقرر فيها جزء من راسي الانفصال بشّدة عن الجزء لاخر ، علاش و كيفاه كان ربي سبحانو يعرف ..
لا و مش كان اكاكا !اوتوماتيكمون عيني تتقرر تنفصل مع اكا الجزء،
في اللحظات هاذيكا ما عاد عندي حتى قدرة باش نشوف و إلا نحكي مع حد و لا نحمل حتى صوت ، اللحظة اذيكا من المستحسن تتجنبني خاطرك نرمال تشوفني نخبط في راسي بأي حاجة تجي قدامي ،نبكي ّ ، نعيط ، نرد ..
حتى تجرب تعاوني بأي حرابش متع راس .. زايد باش تكون محاولة فاشلة .
أكيد الطب اكتشف برشا دوايات و مسكنات اكثر حتى من عدد المرضى بالمرض هذا اما ما فما حتى دواء يخلّي اكا الجزء يرجع لبلاصتو..
والحل؟
الحل أنك تسيبني .. طفيلي الضو و تنقصلي حسّك ..
الظلمة الظلمة ثم الظلمة و الهدوء هوما الوحيدين اللي ينجمو يعدّلو الوضع شوية
توفى الوجايع ؟
الغريب انو توفى الوجايع زادة في رمشة عين ، نرجع نضحك و نفدلك عادي ..
صحيح توفى اما مش قبل ما تتلف أعصابي و يضعف نظري في كل مرة تصير فيها هالنوبة !
خاطر أقل نوبة مدتها 4 سوايع متواصلين ، وأكثرها 3 أيام ..!

ترك الرد

من فضلك ادخل تعليقك
من فضلك ادخل اسمك هنا